Dat gifft ok ne Menge Fördergelder. De Minister hett al seggt, dat in düsse Antwoord ok drinsteiht, wo se dat beandragen künnt. Wi hebbt 350.000 Euro för 90 Projekte van 2007 an, also in fiev Johr. Dat is al ne Menge. Aver ik denk, wenn wi dor all tohopen noch en beten mehr ringeben dööt, dann wöör dat noch beter för ’t Plattdüütsche.
In ’t Mediengesetz för Neddersassen hebbt wi allns de Regional- un Minderheitenspraken mit rinschreven. De NDR un andere Medien hebbt ok gode Programme, de dat Plattdüütsche fördert un as Alldags- un Umgangsspraak ok mit Leven erfüllt. Dat is ne gode Entwicklung.
Ok dat Internet is nich sicher vör dat Plattdüütsche. Ik wüll an düsse Stell ok mol dat KiekebergMuseum erwähnen. Heiner, dor achtern bist du. Ji hebbt de Internetseite för dat Kiekeberg-Museum ok op Plattdüütsch maakt. Dat is ne heel gode Veranstaltung, de ji dor maakt hebbt. Dorför ok mol en Dankeschön. Dat hebbt ji good maakt!
Nu is de Tied fast to Enn. Wi hebbt ne Masse to doon. Ik find, wi schallt all tohopen ut düsse Grote Anfrog nu de Punkte rutfinden, de wi noch umsetten wöölt hier in Neddersassen, un mit den Heimatbund ok noch mol sien Gesetzvörslag diskuteren. Ik denk, letztlich geiht dat dorum, dat Börgerrecht op dat Plattdüütsche in Neddersassen umtosetten. Wenn wi dor alltohopen an arbeidt, dann geiht dat ok wieder vöran för dat Plattdüütsche.
Ik koom van Oostfreesland, mien Jung! - Heer Präsident! Leev Kolleginnen un Kollegen! Besten Dank, dat ik ok even proten düür. Neet all, de Plattdüütsch köönt, snacken platt. Daar, waar ik herkomen doo, ut de Auerker Kuntrei, proten wi Platt.
Aver wi weten ok all, dat de Tieden för Plattdüütsch neet eenfach sünd. Neet mal mehr de Hälfte van uns Bevölkerung kann Platt verstahn. Blot noch jeder Sövente kann Plattdüütsch proten. Daarum finnen ok wi Linken dat richtig, dat wi hier vandaag Platt proten.
Dat weer echt schaad, dat de Minister hier en Bült Klamauk proot hett. - Wi bedanken uns lever bi de Mitarbeiders van de Landesregierung, dat se up en Anfraag van de CDU un de FDP en Överblick över Plattdüütsch in uns Land maakt hebben.
Aver wat seggt uns disse Överblick? - Eerstens: Dat word all minner mit dat Plattdüütsche. Tweedens: Dat gifft en heel Bült Lüü, de wat daartegen maken willen. Dardens: Vansied van de Landesregierung gifft dat neet vööl Unnerstützung.
To eerstens: Innerhalb van een Generation hett sich de Antahl van de Minschen, de Platt proten könen, halbeert. Aver mit de Unnerschrifft unner de Sprokencharta in Europa is uns Land de Verpflichtung ingahn, uns plattdüütsche Spraak to schützen un to fördern.
To tweedens: De Antwoord van de Landesregierung seggt, dat en Bült Theatergruppen, Chöre un anner kulturelle Vereinigungen versöken, uns plattdüütsche Spraak to fördern un lebendig to erhollen. Wi bedanken uns bi all, de sük för de Erhalt van uns Moderspraak insetten. Plattdüütsch mutt man proten. Anners geiht disse Spraak verloren.
Aver wat könen wi van uns Regierung verwachten? - Neet vööl! Ik segg blot: Anfragen oder Dokumente bi uns Landesbehörden sünd up Plattdüütsch gaar neet vörsehn. Wenn man dat mit de Förderung van de plattdüütsche Sprok eernst menen deit, mutten wi dat ännern.
Lehrmaterialien gifft dat ok neet vööl, un an de Uni Ollenbörg gifft dat Fortbildungsangebote för Mesters, aver de will disse Landesregierung ja ok neet verlängern.
Leev Froo Ministerin Wanka, hör Antwoord to de Fraag 132 kann ik tostimmen - nu mutt ik up Düütsch ziteren -: Es gibt „erfolgreiche Ansätze, die niederdeutsche Sprache zu erhalten und zu stärken“. Daar kann ik tostimmen. Ja, dat gifft Ansätze. Aver, leev Froo Wanka, wi bruken mehr as blot Ansätze. Dat is neet genoog,
Daarum segg ik an de Adresse van uns Landesregierung: Maakt Schluss mit de „Ansätze“, maakt endlich Eernst mit de Förderung van uns plattdüütsche Spraak! Doon Se wat för de Erhalt van de kulturelle Vielfalt in uns Land!
Plattdüütsch is en lebendigen Spraak, einzigartig un van en heel besünner Bildhaftigkeit. Se hett en langen Tradition un verdeent uns Schutz un Unnerstützung.
Geachte Präsident! Leive Kolleginnen un Kollegen! Ik will mol nich noch duppelt un dreemaal vörstellen, wat Plattdüütsch för ne wunnerbare Sprake is. Dat weet wi all. Leiver will ik en bittken mehr över de politische Siete snacken.
Aver laat mi ok eerst mol besten Dank seggen to all de Lüü in ’t Ministerium, in dat Institut för Nedderdüütsche Sprake un in ’t ganze Land, de mit disse 140 Fragen en Masse Arbeid harren.
Dat sünd gode Informationen. Dat is ein halvet Book, dat wi dor to lesen kriegt. Aver wi hebbt vörher al seggt: De Frakschonen von CDU un FDP
De lesten Dage hebb ik en Breev kregen van de Akschoon „Plattdüütsch hört dorbi“. Dat güng üm use vörige Diskussion up Platt un över dat Plattdüütsche. Un de leste Satz güng so: De Frakschonen hebbt altohoop nix up de Benen sett.
Nu is dat ja man so, dat de Mehrheid wat besluten kann, de ännern nix. Un för de Mehrheid is dat en Tüügnis, wor insteiht: Sess! Sett jo inne Ecke un schäämt jo!
Wie is dat dorto komen? - Ik glööv, manges geiht Politik so, as de lüttke Jan sük dat vörstellt: En poor Lüü ut de CDU, de hebbt tosamen seten un hebbt seggt: Wi mööt wat för dat Plattdüütsche un för dat Seelterske doon. Use Frünnen ut den Heimatbund sünd al weer an drinsen.
Nu seggt de Eerste: Wi lehrt Platt as Fremdspraken inne School! - Seggt Möllring: Geiht nich, is to düür! - Denn drinkt se ne lüttje Lage up den Schreck un denkt wieder na.
Denn seggt de Tweete: Den Lehrstohl in Ollenborg utbauen, dat wöör good! - Seggt Möllring: Geiht nich, is to düür! - Un denn drinkt se noch ne lüttje Lage up den Schreck un denkt noch wieder na.
Na 14 Ideen un 14 Sluck un Beer sünd se besopen, aver nix wieter. Un denn hebbt se besloten: Wi köönt ja mol den Minister fragen, wat wi doon köönt.
Dat is en Doktor, de mott dat weten. Un de Ministerin, de is Professor, de mott dat ok weten. Un denn doot wi jedenfalls so, at of wi wat döön.